په کراچۍ کې د طالبانو قونسلګرۍ ویلي چې د پاکستان له بندخونو یې ۵۴ افغان کډوال خوشې کړې دي.
نوموړې قونسلګرۍ چهارشنبه د وري پر ۱۵مه په یوې خپرې کړې خبرپاڼه کې ویلي چې دا کډوال د سند ایالت له بېلابېلو زندانونو ازاد شوي دي.
په کراچۍ کې د طالبانو تر کنټرول لاندې افغان قونسل عبدالجبار تخاري په یوې ویډيو کې ویلي چې په دې کسانو کې ۱۱ ماشومان هم دي.
د نوموړي په خبره، له دې وړاندې د پاکستان له زندانونو څخه د ښځو او ماشومانو په ګډون څلور زره او ۱۱۱ افغانان ازاد شوي دي.
هغه زیاته کړې چې لا هم ۵۰ نور افغان کډوال د سند ایالت په بندخونو کې بندیان دي او د ازادولو هڅې یې روانې دي.
دا په داسې حال کې ده چې څه موده وړاندې هم ۴۰ افغان کډوال د پاکستان له زندانونو خوشې شوي و.
له تېرو څو میاشتو راهیسې پاکستان په دغه هېواد کې د افغان کډوالو د نیولو او ایستلو لړۍ پېل کړې ده
