په کراچۍ کې د طالبانو قونسلګرۍ ویلي چې د پاکستان له بندخونو ۴۰ افغانان ازاد شوي دي.
د پاکستان په کراچۍ کې د طالبانو قونسلګرۍ یکشنبه د کب پر ۱۳مه په خپله ایکسپاڼه کې یو پیغام کې لیکلي چې په دې ډله کې ښځې هم دي.
د خبرپاڼې په حواله، دا افغانان د کراچۍ له زندانونو ازاد شوي دي.
یادې قونسلګرۍ زیاته کړې چې په څه باندې یو کال کې د پاکستان له زندانونو د ښځو او ماشومانو په ګډون درې زره او ۲۶۱ افغان بندیان ازاد او هېواد ته لېږل شوي دي.
د روان کال په جدي میاشت کې هم د پاکستان د سند ایالت له زندان څخه ۵۸ افغانان ازاد شوي و.
دا په داسې حال کې ده چې تېرو څو میاشتو کې پاکستان د افغانانو د شړلو او بندي کولو لړۍ پېل کړې ده.
