د واشنګټن پولیسو یو ۱۵ کلن ځوان د نصرت احمدیار د وژلو په تور چې په افغانستان کې د امریکايي ځواکونو پخوانی ژباړن و، نیولی دی.
د واشنګټن پوسټ د راپور پر بنسټ، دا ځوان جمعه، د مارچ په لومړۍ نېټه نیول شوی دی.
که څه هم د واشنګټن پولیسو د دې ځوان د هویت په هکله نور جزئیات نه دي خپاره کړي؛ خو ویلي یې دي چې دی د نصرت د وژلو پرمهال ۱۴ کلن و.
نصرت د پروان ولایت د بګرام ولسوالۍ اصلي اوسېدونکې و او د طالبانو بیاځلې واکمنۍ وروسته له خپلې مېرمن او څلورو ماشومانو سره امریکا ته کډوال شو.
ده د متحده ایالاتو په پلازمینه واشنګټن ښار او شاوخوا سیمو کې له «لېفټ» شرکت سره د ټکسي چلونکي په توګه کار کاوه.
هغه مهال، د واشنګټن د پولیسو څانګې ویلي و، هر چا چې د نصرت د قتل د عاملینو په هکله معلومات ورکړل، دوی به ۲۵ زره امریکايي ډالره جایزه ورکړي.
