د متحده ایالاتو د سرشمیرنې ادارې اعلان کړی چې د نړۍ نفوس به د ۲۰۲۴ کال په لومړۍ ورځ له ۸ ملیارډو څخه ډېر شي.
د دغه راپور پر بنسټ، چې د یکشنبې ورځ، د ډسمبر په ۳۱مه خپور شو، د نړۍ په نفوس کې سږکال ۷۵ میلیونه کسان زیاتوالی راغلی دی.
د دې ادارې په وینا، سږکال د نړۍ د ودې کچه د ۱سلنې څخه لږ څه کمه وه.
د ادارې د وړاندوینې له مخې، د ۲۰۲۴ له پیل څخه به نړۍ کې په هره ثانیه کې ۴.۳ زیږون او دوه مړینې ثبت شي.
په امریکا کې سږکال د نفوسو د ودې کچه ۰.۵۳ سلنه وه او د دغه هېواد په نفوس کې ۱.۷ میلیونه کسان اضافه شوي دي.
په دې توګه به د ۲۰۲۴ کال په لومړۍ ورځ د امریکا نفوس ۳۳۵.۸ میلیونه کسانو ته ورسېږي.
د بروکینګز انسټیټیوټ د سرشمیرنې کارپوه ویلیم فري ویلي: «که اوسنی سرعت د لسیزې تر پایه دوام وکړي، ۲۰۲۰ کال د امریکا په تاریخ کې تر ټولو ورو ودې لسیزه او له ۲۰۲۰ څخه تر ۲۰۳۰ کلونو پورې د ۱۰ کلونو په موده کې د ودې کچه له ۴ سلنې څخه کمه وي. د ودې ترټولو ورو لسیزه اوس په ۱۹۹۰ لسیزه کې وه، کله چې د ودې کچه ۷.۳ سلنه وه.»
تمه کېږي چې متحده ایالات د ۲۰۲۴ کال له پیل سره په هرو ۹ ثانیو کې یو زیږون او په هر ۹.۵ ثانیو کې یوه مړینه تجربه کړي.
د سرشمیرنې د ادارې د راپور له مخې له نورو هېوادونو څخه د خلکو کډوالي به په امریکا کې د نفوسو کمښت مخه ونیسي.
