د ملګرو ملتونو د بشري حقونو کمېشنر ولکر ترک د طالبانو امر باالمعروف او نهی عنی المنکر قانون تصویب ظالمانه بللی او ویلي دي چې دا قانون د افغانستان نیمايي نفوس څنډې ته کوي.
نوموړي دا څرګندونې دوشنبه د وږي پر ۱۹مه د بشري حقونو شورا اووه پنځوسمې غونډې له پېلېدو وړاندې کړې دي.
د ملګرو ملتونو دغه چارواکي ټينګار کړی چې د طالبانو نوی قانون په کلکه توګه د تجمعاتو او عقیدې ازادي محدودوي.
نوموړي زیاته کړې: «دا چې د افغان نجونو او ښځو په اړه فکر کوم، لړزه مې نیسي.»
د ملګرو ملتونو د بشري حقونو کمېشنر په اوسني پېر کې د ښځو پر وړاندې د طالبانو د ځپنې کړنې بېسارې بللې دي.
ولکر ترک ویلي چې ښايي دا قانون په «سمبال شوې بڼه پر جنسي ځورونې» بدل شي او ښځې له ناوړه شرایطو سره مخامخې کړي.
د یادونې ده چې د طالبانو امر باالمعروف او نهی عنی المنکر قانون کې د ښځو غږ عورت بلل شوی دی.
دغه قانون ته په کور ته دننه او بهر پراخ غبرګونونه ښوول شوې دي.
