ملګرو ملتونو خبر ورکړی چې د دغه سازمان امنیت شورا د افغانستان په هکله ناسته کوي.
دا ناسته به دوشنبه، د کب پر ۷مه سهار ۱۰:۰۰ بجې تر غرمې مخکې ترسره شي.
دا د دوحې له ناستې وروسته د افغانستان په هکله د ملګرو ملتونو د امنیت شورا لومړۍ ناسته ده.
د دوحې ناسته تېره اوونۍ د فبرورۍ په ۱۸مه او ۱۹مه د ملګرو ملتونو د سرمنشي په کوربهتوب او د هېوادونو د ځانګړو او د افغان مدني فعالانو د استازو په ګډون ترسره شوه.
انتونیو ګوترېش، د امریکا او اروپايي ټولنې استازو دغه ناسته رغنده بللې ده.
ورته مهال، د افغانستان په چارو کې د امریکا ځانګړي استازي توماس ویسټ د دوحې د ناستې په هکله ویلي چې په افغانستان کې د ګډو ګټو په تړاو د هېوادونو ترمنځ پیاوړې اجماع موجوده ده.
هغه ویلي، هېڅ هېواد نه غواړي چې په افغانستان کې دې د ترهګرۍ نفوذ او ګواښ وي او ټول د دې غوښتونکي دي چې ښځې او نجونې ښوونځیو، پوهنتونونو، کار او عامه ژوند ته ستنې شي.
