د ملګرو متلونو د امنیت شورا د بندیزونو د تحلیل او څارنې ګروپ وايي چې د طالبانو او القاعدې ترمنځ اړیکې لاهم نږدې دي او دې شبکې په افغانستان کې اته نوي روزنیز کمپونه جوړ کړي دي.
د ملګرو ملتونو د امنیت شورا د بندیزونو د تحلیل او څارنې ډلې چهارشنبه د سلواغې پر ۱۱مه په خپل خپاره کړي نوي راپور کې ویلي چې د القاعده شبکې څلور اډې په پروان، غزني، لغمان او روزګان ولایتونو کې دي او دې شبکې په پنجشېر کې د وسلو یو زېرمتون هم جوړ کړی دی.
د دغه راپور پر بنسټ، طالبان هڅه کوي له القاعده سره خپلې اړیکې کمرنګه وښيي؛ خو په افغانستان کې لږ تر لږه د دغې شبکې ۱۰ غړي له طالبانو سره تاریخي اړیکې لري.
د راپور پر بنسټ، القاعده توانېدلې چې په افغانستان کې د طالبانو تر ادارې لاندې ځان په «ساتندویه» حالت کې وساتي او د دې شبکې لوړپوړي چارواکي هم په دغه هېواد کې حضور لري.
د ملګرو ملتونو د امنیت شورا په خبره، القاعده لاهم د افغانستان لپاره او تر هغه ورپورته یو ګواښ دی.
د راپور په حواله، ځيني طالب قوماندانان له القاعدې سره د ایډیالوژۍ او عمل په برخه کې مشترک دي چې له تاریخي اړخه په «ګډو ترهګریزو او شخصي اړیکو» کې رېښه لري.
د ملګرو ملتونو د امنیت شورا زیاته کړې چې د راپورونو له مخې، د طالبانو له لوري د القاعده شبکې د ځينو فعالیتونو د محدودولو هڅه، د دې ډلې او شبکې ترمنځ د کړکېچ لامل شوې ده.
له بلې خوا د ملګرو ملتونو د امنیت شورا د بندیزونو د تحلیل او څارنې ډلې په خپل دغه راپور کې، د داعش ګواښ ته هم اشاره کړې ده.
د ملګرو ملتونو د امنیت شورا ویلي، د سیمې له لاسه ورکولو او مرګ ژوبلې، د لوړپوړو او منځنۍ کچې مشرانو په ګډون د جنګیالیو له منځه تللو سربېره، لا هم داعش د افغانستان او سیمې لپاره یو ګواښ دی.
په راپور کې راغلي چې د طالبانو د فشار په پاېله کې د داعش بریدونه کم شوي دي.
د راپور په حواله، داعش هم د طالبانو په منځ کې پام وړ نفوذ لري.
د ملګرو متلونو د امنیت شورا د بندیزونو د تحلیل او څارنې ګروپ وايي چې په افغانستان کې د داعش ډلې موخه په لومړي قدم کې شیعهګان، په دویم ګام کې طالبان او بیا ملکیان دي.
طالبانو تراوسه د دغه راپور په اړه غبرګون نه دی ښودلی.
څه موده وړاندې د ملګرو ملتونو د امنیت شورا ویلي و چې القاعده شبکه د طالب لوړپوړو چارواکو په ملاتړ په دولتي بنسټونو کې نفوذ کړی دی او دا شبکه له ترهګرو ډلو سره د طالبانو د پرېکون ژمنې له مخې، په پټه په افغانستان کې فعالیت کوي.
