د ملي مقاومت جبهه ادعا کوي چې په هرات ولایت کې پر طالبانو د دې جبهې د ځواکونو په برید کې یو طالب قوماندان وژل شوی دی.
دغې جبهې د اېکس پر ټولنیزه شبکه په خپره کړې اعلامیه کې ویلي چې دغه برید د سه شنبې پر شپه د تلې پر ۱۷مه، د هرات-کرخ پر سړک او د «کهریزک» پوستې ته څېرمه شوی دی.
د اعلامیې له مخې، په دغه برید کې د هرات پر لویه لاره د طالبانو د کشف کنډک آمر وژل شوی دی او د هغه دوه ساتونکي ټپیان شوي دي.
د ملي مقاومت جبهه وایي چې د طالبانو یو اندازه پوځي تجهیزات هم د دې جبهې د ځواکونو لاسته لوېدلي دي.
دا په داسې حال کې ده، چې څو ورځې وړاندې هم دغې جبهه ادعا کړې وه چې په هرات کې یې دوه طالبان جنګیالي وژلي دي.
