د سمنګان ولایت طالب سیمهییز مسوولان وايي چې په دغه ولایت کې یوه سړي یو کس په چاقو وژلی او څلور نور یې ټپیان کړي دي.
دا پېښه پرون سېشنبه، د کب پر ٨مه د سمنګان ولايت په مرکز ايبک ښار کې رامنځته شوې ده.
د طالبانو د سمنګان امنیه قومانداني وايي چې دا پېښه د دغه ولایت د شپږو اوسېدونکو ترمنځ له لفظي شخړې وروسته رامنځته شوې ده.
د پېښې تورن د طالبانو له لوري نيول شوى دى.
ورته مهال، د سمنګان ولايتي روغتون سرچينې د دې پېښې د ټپيانو له ډلې د يوه کس روغتيايي وضعیت د اندېښنې وړ بللی دی.
په دې وروستيو کې په سمنګان ولايت کې جنايي پېښې زياتې شوې دي.
شاوخوا یوه میاشت وړاندې طالبانو خبر ورکړی و چې په تېرو اتو میاشتو کې یې په دغه ولایت کې د جنايي پېښو په تړاو ۷۳۰ کسان نیولي دي.
