د خوړو نړۍوال پروګرام: افغانستان کې به روان کال ۳.۵ میلیونه ماشومان له خوارځواکۍ سره مخ شي

د خوړو نړۍوال پروګرام وایي، په افغانستان کې به روان کال ۳.۵ میلیونه ماشومان په خوارځواکۍ اخته شي.
دغه پروګرام د ماشومانو د خوارځواکۍ په زیاتوالي اندېښنه څرګنده کړې، او ټینګار کوي چې مالي ملاتړ ته اړتیا ده.
د خوړو نړۍوال پروګرام سرپرستې موټېنټه چېموکا هم ویلي، چې افغانستان په تاریخ کې د ماشومانو د خوارځواکۍ ترټولو سخت وضعیت سره مخ دی.
د امریکا د مرستو بندېدو له امله ګڼ بشري پروګرامونه د بودجې کموالي له کبله متوقف شوي، او د سور صلیب په وینا، د راستنېدونکو کډوالو بشري اړتیاوې لوړې دي، په ځانګړې توګه ماشومان چې له خوارځواکۍ سره مخ دي.
په داسې حال کې چې ایران او پاکستان افغان کډوال له خپلو هېوادونو شړلي، ښايي د ماشومانو د خوارځواکۍ کچه لا زیاته شي.