په پاکستان کې پر افغانستان خبریال احمد هنایش له برید دوه ورځې وروسته د خبریالانو نړۍوال فدراسیون (IFJ) له اسلاماباده غوښتي چې په دې هکله پلټنې وکړي.
نوموړي فدراسیون جمعه د وري پر ۱۷مه یوه اعلامیې خپره کړې او په اسلاماباد کې یې د ازادۍ راډیو پر خبریال برید غندلی دی.
د یاد بنسټ په اعلامیه کې راغلي دي: «د خبریالانو نړۍوال فدراسیون (IFJ) او د افغانستان د ازادو خبریالانو ټولنه (AIJU) له چارواکو غوښتنه کوي څو سملاسي پلټنې وکړي او ډاډ ترلاسه کړي څو عاملان یې عدالت ته سپارل کېږي.»
د ازادۍ راډیو خبریال او په پروان او پنجشېر ولایتونو کې د دوو سیمهییزو رسنیو مشر احمد هنایش چهارشنبه شپه د وري پر ۱۵مه د پاکستان پلازمېنې اسلاماباد په جي۶ سیمه کې پر سر او پښه یې د ډزو په پایله کې ټپي شوی دی.
هنایش واک ته طالبانو له بیاځلې رسېدو وروسته پاکستان لاړ څو د خپلې کډوالۍ دوسیه تعقیب کړي.
له اسلاماباده دا غوښتنه په داسې حال کې شوې چې د روان کال د مارچ پر ۱۴مه د پاکستان يو مشر خبريال صغيراحمد لار د موټرسايکل سپارو ناپېژانده وسلهوالو له لوري ووژل شو او د هغه د وژنې په تړاو تراوسه څوک نه دي نيول شوي.
