د افغانستان لپاره د بشری حقونو د ځانګړي راپور ورکوونکی ریچارډ بنېټ د وروستي راپور په تړاو د غبرګونونو په لړ کې د بشری حقونو د فعالانو ټولنه وایي، چې دغه راپور د طالبانو لخوا د بشري حقونو د نقض او جنایتونو ښودنه کوي.
دغې ټولنې چهارشنبه، د غبرګولي پر ۳۰مه په یوه خبرپاڼه کې په ډاګه کړې، چې طالبانو په سیستماتیک ډول له محاکمې پرته ناقانونه، خپلسرې او بې رحمانه وژنې کړې دي.
د بشري حقونو فعالانو د بنېټ له راپوره د ملاتړ په څرګندولو سره ویلي دي، چې د بندیانو او سیاسي مخالفینو سخته شکنجه او له هغوی سره غیر انساني چلند دوام لري.
دغې ټولنې د طالبانو لخوا د بشری حقوقو د نقض ډېرو مواردو ته په نغوتې سره ټینګار کړی دی چې طالبانو له سرو کرښو په تېریدو سره نه یوازې د هېواد د خلکو شخصي حریم ته درناوی نه دی کړی بلکې په پلان شوي او عقده مندانه ډول یې د ځوانو ښځو او نجونو په برمته کولو سره د خلکو پت او عزت ته سپکاوی کړی چې په دغه راپور کې د دې مسألې ځای سخت خالي دي.
د بشري حقونو فعالان وايي چې طالبان د دغو «وحشیانه جنایتونو» د ترسره کولو له امله د سملاسي ځپلو او ماتې مستحق دي او باید محاکمه شي.
د ښځو د حقونو نقض، د بیان د ازادۍ ځپل، عمومي مجازات او د بدن د غړو پرې کول د بنېټ په راپور کې هغه نور راغلي موارد دي چې د بشري حقونو د فعالانو له هرکلي سره مخ شوي دي.
د بشري حقونو د فعالانو د ټولنې په اعلاميه کې راغلي دي: «هر ډول اقدام چې عدالت پکې په پام کې ونه نیول شي، پایښت لرونکې پايلې نه لري. یوازې د ترهګرۍ په ځپلو او محاکمه کولو سره د قربانیانو د حقونو د ترلاسه کولو، په هېواد کې د عدالت د بیرته راستنولو او نړیوال امنیت د ډاډمنولو هیله کېدای شي.»
دغې ټولنې خلکو ته د دوحې د دریمې غونډې په مناسبت د اعتراضونو بلنه هم ورکړې ده.
په داسې حال کې چې د افغانستان په تړاو د دوحې درېیمې غونډې ته لس ورځې پاتې دي، تمه کیږي چې په دې غونډه کې د هېواد په تړاو رغنده پرېکړې وشي.
خو طالبانو د دوحې د غونډې په درشل کې په افغانستان کې د بشري حقونو د نقض په تړاو د بنېټ د راپور خپرول د خلکو د اذهانو خرابول بللي دي.
