د طالبانو ویاند ذبیحالله مجاهد د افغانستان په اړه د ملګرو ملتونو امنیت شورا غونډې ته په غبرګون کې ویلي چې د دوی د ګټو خلاف پرېکړې به عملي نه شي.
مجاهد دوشنبه د کب پر ۷مه د طالبانو تر واک لاندې ملي راډیو ټلویزیون ته ویلي چې په سیمهییزو او نړیوالو غونډو کې هره هغه پرېکړه چې په وینا یې، د ګټو خلاف یې وي، هېڅکله به عملي نه شي.
نوموړي زیاته کړې که دا ډول غونډې «د افغانستان او افغانانو د ملاتړ په ځانګړي ډول په ډیپلوماټيکو اړیکو کې د پرمختګ لپاره وي» په خبره یې، طالبان به ترې هرکلی وکړي.
بلخوا، په قطر کې د طالبانو د سیاسي دفتر رییس سهیل شاهین هم ویلي چې له نړیوالې ټولنې سره د «ښو او حسنه اړیکو» غوښتونکي دي.
نوموړي زیاته کړې چې د اختلافي مسایلو د حل لپاره دې نړیواله ټولنه د طالبانو دریځ او نظر په پام کې ونیسي.
ملګرو ملتونو پرون اعلان وکړ چې ټاکل شوې د افغانستان په اړه د امنیت شورا غونډه جوړه شي.
دا د دوحې له غونډې وروسته، د افغانستان په اړه د ملګرو ملتونو د امنیت شورا لومړنۍ ناسته ده.
