د کانګرېس غړی او د امریکا د استازو جرګې د منځني ختیځ، شمالي افریقا او مرکزي اسیا د فرعي کمېټې مشر جو ویلسون وايي چې د «طالبانو له جبره» د افغانستان د خلاصون او دغه هېواد د «ترهګرو» په پټنځای د نهبلېدو لپاره، د دغې ډلې له مخالفو جبهو څخه د واشنګټن ملاتړ لازمي دی.
د امریکا استازو جرګې جمعه د تلې پر ۲۷مه په یوه خپاره کړي بیان کې د افغانستان د متحدې جبهې له مشر سره د جو ویلسون د لیدنې خبر ورکړی دی.
د بیان پر بنسټ، په دې لیدنه کې د افغانستان د متحدې جبهې مشر سمیع سادات ویلسون ته په هېواد کې د «ترهګرۍ» د ورځ تر بلې زیاتېدو ګواښ خبرتیا ورکړې ده.
په بیان کې راغلي: «دا ګواښ د سیمې بې ثباتي روانه ساتي او د امریکا متحده ایالاتو او همداراز په ټول منځني ختیځ او افریقا کې د امریکا ډیپلوماتیکو، پوځي او سوداګریزو ګټو ته د پام وړ خنډونه جوړوي.»
په دې لیدنه کې د افغانستان د متحدې جبهې د سیاسي کمېسیون مشر عبدالقیوم رحیمي او د کولمبیا خونې رئیس او اجرائیوي مدیر کارل ډبلیو بلیکسټون او همداراز د امریکا پخواني پوځي افسر جیمز سمېټ هم حضور لرلو.
د بیان پر بنسټ، د دې لیدنې اصلي محور د امریکا په استازو جرګې د طالبانو پر وړاندې د مخالفو جبهو د پیاوړتیا په موخه د یوې طرحې جوړول بلل شوي دي.
ویلسون همداراز د طالبانو تر کنټرول لاندې افغانستان کې د بشري حقونو په ځانګړې توګه د ښځو حقونو وضعیت ناوړه ښودلی دی.
د هغه په اند، روان وضعیت د منلو وړ نه دى او د نړيوالې ټولنې سملاسي پاملرنې ته اړتيا لري.
څه موده مخکې د افغانستان د مقاومت جبهې یوه پلاوي هم د امریکا د استازو جرګې له غړو سره لیدنې او خبرېاترې کړې وې.
دا په داسې حال کې ده چې له دې مخکې د امریکا دولت ویلي و چې د طالبانو پر ضد له پوځي جبهو ملاتړ نه کوي.
