د امریکا یو شمېر ادارو له خپلو کارکوونکو غوښتي چې د امریکا د ولسمشر ډونالډ ټرمپ د سلاکار ایلان ماسک دې غوښتنې ته ځواب ور نه کړي چې « تېره اوونۍ یې څه کړي دي.»
رویټرز دوشنبه د فبرورۍ پر ۲۴مه راپور ورکړی چې ایلان ماسک له بېلابېلو دولتي ادارو غوښتي چې په تېره یوه اوونۍ کې د خپلو کړو چارو راپور ورکړي.
په همدې حال کې ماسک پر خپله اېکس پاڼه لیکلي چې که دې غوښتنې ته ځواب ور نه کړل شي، کارکوونکي به له دندو ګوښه شي.
د امریکا بېلابېلو ادارو خپلو کارکوونکو ته یادونه کړې چې ایلان ماسک د کاري ځواک د کمولو په لټه کې دی.
دغو ادارو خپلو کارکوونکو ته سپارښتنه کړې چې له خپلو رسمي مسوولانو پرته نور چاته ځواب ونه وايي.
دا په داسې حال کې ده، چې ایلان ماسک د امریکا «د دولت د اغېزناکتیا د چارو» مشري پر غاړه لري او په لومړیو اوونیو کې یې له ۲۰ زرو زیات کارکوونکي له دندو لېرې کړي دي.
