د افغانستان لپاره د امریکا ځانګړي استازي توماس وېسټ د قطر د بهرنیو چارو له وزیر محمد الخلیفي سره لیدلي دي.
وېسټ چهارشنبه د غبرګولي پر ۲مه په خپله اېکسپاڼه کې لیکلي چې «د افغانستان راتلونکې او د پرمختګ لاره» د دې خبرواترو محور و.
همداراز په دې لیدنه کې د افغانستان لپاره د امریکا ځانګړي استازي د «حل په پراختیا او د ګډو ټکو په رامنځته کېدو کې د قطر فعاله ونډه» ستایلې ده.
دمګړۍ قطر د افغانستان په سیاست کې مهم لوبغاړی بلل کېږي.
له طالبانو سره د قطر اړیکې د دغې ډلې د ظهور لومړیو کلونو ته ورګرځي؛ خو په قطر کې د طالبانو د سیاسي دفتر پرانېستل او د دوحې له خوا له دغې ډلې پراخ ملاتړ او بیا د امریکا او طالبانو ترمنځ د دوحې هوکړې لاسلیکېدلو وروسته دغه هیواد د افغانستان په تحولاتو کې د یو اغېزمن عامل په توګه بدل شوی دی.
