په دایکندي او بامیان کې د نسیم راډیو خپرونې بندې شوې

د نسیم راډیو چې دایکندي او بامیان ولایتونو کې یې خپرونې کولې، له ۱۳ کلونو وروسته خپل نشرات بند کړل.

په یوه اعلامیه کې یې ویلي چې نور د خپرونو دوام ممکن نه دی او هیله لري چې په راتلونکي کې به د شرایطو ښه کېدو سره بیا خپرونې پیل کړي.

دغه بندیز څو ورځې وروسته له هغه راغی چې طالبانو د راډیو مدیر او دوه خبریالان ونیول.

د طالبانو استخباراتو د نیول شوو کسانو له ازادۍ وروسته د خپرونو بندولو شرط ایښی و. په دې وروستیو کلونو کې په افغانستان کې پر رسنیو محدودیتونه زیات شوي دي.