د افغانستان خبریالانو مرکز ویلي چې د «مینې» مجلې بنسټګر له ۱۱۷ ورځنې بند تېرولو وروسته خوشې شوی دی.
نوموړي مرکز سهشنبه د غبرګولي پر لومړۍ په یوې خپرې کړې خبرپاڼه کې لیکلي چې عزتالله ځواب په کابل کې د طالبانو کورنیو چارو وزارت له بنده ازاد شوی دی.
د نوموړي زوی عطاالله ځواب هم پر خپله فېسبوکپاڼه د دې خبر پخلی کړی.
یاد مرکز زیاته کړې چې ځواب له دې وړاندې د نجونو پر زدهکړو بندیز ته په غبرګون کې د لیکل شوي شعر لامله ګواښل شوی و؛ خو طالب امنیتي چارواکو یې کورنۍ ته ویلي چې د نوموړي اوږدمهاله بند د هغه لیکوالۍ او مجلې پورې تړاو نه درلود.
دغه بنسټ، د عزتالله ځواب له ازادېدو هرکلی کړی او زیاته کړی ده چې نوموړی د تېر کال په دلوې میاشت کې د کابل څرخي پله په سیمه کې د طالبانو کورنیو چارو وزارت پورې اړوند کسانو د «الکولي او نشهيي موادو د لېږد» په تور نیولی و.
عزت الله ځواب د مينې په نوم د یوې مجلې بنسټګر او مسوول مدير دی.
له څه مودې راهیسې په ټولنیزو شبکو کې د نوموړي د خوشې کېدو غوښتنه کېده.
د طالبانو له خوا د خبریالانو او لیکوالو نیول او شکنجه کول کومه نوې خبره نه ده.
څه موده وړاندې د «مطبوعاتو ازادۍ د نړیوالې ورځې» په مناسبت د افغانستان خبریالانو مرکز په هېواد کې پر رسنیو او خبریالانو د محدودیتونو لا ډېرېدو او په پراخه توګه د خبریالانو د نیونې له دوامه اندېښنه ښودلې وه.
