د ملګرو ملتونو د ماشومانو وجهي صندوق (یونیسف) خبر ورکړی چې جاپان به په افغانستان کې د واکسیناسیون خدمتونو د وړاندې کولو په موخه ۶.۹ میلیونه ډالره مرسته وکړي.
یونیسف سېشنبه د غويي پر ۲۵مه په یوې خبرپاڼه کې ویلي چې دا مالي مرسته به په افغانستان کې ښځو او ماشومانو ته د واکسین او تجهیزاتو د برابرولو په برخو کې ولګول شي.
د یونیسف په خبره، له دې مرستې سره به ۴.۱ میلیونه ماشومان او ښځې د شري، توبرکلوز، ګوزڼ، زېړ زېړي او تیتانوس په ګډون د بېلابېلو ناروغیو پر وړاندې واکسین ترلاسه کړي.
همداراز د واکسیناسیون د ملي کمپاین له لارې به ۴.۷ میلیونه ماشومان د پولیو واکسین ترلاسه کړي.
په خبرپاڼه کې راغلي چې په افغانستان کې د وژونکو او د مخنيوي وړ ناروغيو د اخته کېدو ګواښ لا هم لوړ دى.
که څه هم طالبان ادعا کوي چې په هېواد کې د پوليو ناروغي له منځه تللې؛ خو د روغتيا نړۍوال سازمان روان کال په کونړ او نورستان ولايتونو کې د پوليو دوه مثبتې پېښې ثبت کړې دي.
