د طالبانو د بهرنیو چارو وزارت د افغانستان لپاره د پاکستان ځانګړي استازي اصف دراني د وروستیو څرګندونو په غبرګون کې ویلي چې په حقیقت کې له پاکستانه پر نورو هېوادونو د بریدونو ګواښ شته دی.
د طالبانو د بهرنیو چارو وزارت مرستیال ویاند، حافظ ضیااحمد تکل، سهشنبه، د زمري پر ۳۰مه، په اېکسپاڼه کې لیکلي چې د دغې ډلې تر واک لاندې له افغانستانه د سپټمبر ۱۱مې په څېر د برید د احتمال په تړاو د دراني وروستۍ څرګندونې حقیقت نه لري.
د تکل په وینا، دا څرګندونې د طالبانو په هکله د عامه افکارو د مغشوشولو یوه هڅه ده.
هغه زیاته کړې: «هغه ستونزې او ګواښونه چې «دراني» افغانستان ته منسوب کړي، په حقیقت کې دا ټول د سپټمبر ۱۱مې په څېر د برید احتمال په پاکستان کې لیدل کېږي.»
د طالبانو د بهرنیو چارو وزارت ویاند مرستیال لیکلي چې د ډیورنډ کرښې په اوږدو کې د داعش پټنځایونو د له منځه وړلو په صورت کې به د دغې ډلې ګواښ په بشپړه توګه له منځه لاړ شي.
نوموړي طالب چارواکي ادعا کړې چې د دغې ډلې تر واک لاندې افغانستان اوس مهال له کومې امنیتي ننګونې سره نه دی مخ.
تکل زیاته کړې چې دغه ډله د بهرنیو هېوادونو پر پورونو او مرستو د تکیه کولو پرځای هڅه کوي څو د کورنیو سرچینو د کارونې له لارې اقتصادي ځانبسیاینه ترلاسه کړي.
د یادونې ده چې د افغانستان لپاره د پاکستان ځانګړي استازي اصف دراني د طالبانو تر کنټرول لاندې افغانستان کې د داعش ګواښ ته په اشارې خبرداری ورکړی و چې ښايي د ۲۰۰۱ کال د سپټمبر ۱۱مې په څېر یو بل برید له دغه هېواده ترسره شي.
