د طالبانو د امربالمعروف وزیر خالد حنفي وايي، کفري نړۍ او مخربې کړۍ هڅه کوي چې اسلامي نظام په افغانستان کې پیاوړی نهشي.
هغه دا څرګندونې د کابل پولي تخنیک پوهنتون یوې غونډې ته د وینا پر مهال وکړې. نوموړي د عصري زدهکړو ارزښت ته په اشارې سره وویل، مسلمانانو لومړی ساعت او کاغذ جوړ کړی، چې دا د نوښتونو څرګندونه کوي.
حنفي داسې مهال د عصري زدهکړو ستاینه وکړه، چې په خپله طالبان له دې مفهوم سره بېلابېل دریځونه لري.
د طالبانو مشر ملاهبتالله او نږدې ملګري یې د پوهنتوني زدهکړو سره ښکاره مخالفت لري او له همدې کبله یې د دیني مدرسو شمېر زیات کړی دی.
نیوکې دا دي، چې طالبان غواړي د پوهنتونونو اکاډمیک چاپېریال له منځه یوسي او پر ځای یې خپل سختدریځه مذهبي افکار حاکم کړي.
