د افغانستان د ملي امنیت پخواني مشر معصوم ستانکزي ویلي، چې د افغانستان د ناورین دوام د پاکستان د سیاست برخه ده.
نوموړي زیاته کړه، تر هغه چې د پاکستان په سیاست کې رښتینی بدلون رانهشي، نهيوازې افغانستان، بلکې خپله پاکستان به هم له جدي ستونزو سره مخامخ وي.
ستانکزي د اېکس په یوه سپېس کې وویل، پاکستان له خپل جوړېدو راهیسې په افغانستان کې د نفوذ او «عمق ستراتیژیک» په لټه کې و، خو دغه تګلاره نهيوازې افغانستان، بلکې خپله پاکستان ته هم زیان رسولی دی.
هغه ټینګار وکړ، چې د افغانستان د ثبات کلیدي حل د واقعي بدلون او د خلکو د ملاتړ په رامنځته کولو کې نغښتی دی.
