د طالبانو د کورنیو چارو وزارت ویاند عبدالمتین قانع ویلي، د طالبانو دوه پخواني غړي چې له ګوانتانانو زندانه ازاد شوي و او په عمان کې اووه کاله «تر څار لاندې» ساتل کېدل، سبا (دوشنبه) کابل ته راستنېږي.
قانع یکشنبه د سلواغې پر ۲۲مه په خپله ایکسپاڼه کې د دغو کسانو نومونه عبدالظاهر صابر او عبدالکریم ښودلي دي.
د نوموړي په خبره، عبدالظاهر صابر د لوګر د حصارک کلي اصلي اوسېدونکی دی چې د ۲۰۰۲ کال د مې پر ۱۰مه امریکايي ځواکونو نیولی و.
قانع زیاته کړې چې صابر اووه کاله په عمان کې تر څار لاندې ژوند کاوه او د سفر اجازه یې نه لرله.
له بلې خوا نوموړي زیاته کړې، عبدالکریم د خوست د تڼیو ولسوالۍ د ووزیانو کلي اصلي اوسېدونکی دی چې د ۲۰۰۲ کال د اګست پر ۱۴مه د پاکستاني حکومت له خوا نیول شوی او څو میاشتو وروسته امریکايي ځواکونو ته سپارل شوی و.
قانع زیاته کړې چې عبدالکریم د ۲۰۰۳ کال په لومړیو کې ګوانتانامو زندان ته لېږدول شوی او له ۱۴ کلن بند وروسته ازاد او عمان ته لېږدول شوی و.
دا په داسې حال کې ده چې د تېر کال په وږي میاشت کې په امریکايي ګوانتانامو زندان کې د طالبانو وروستی بندي بشر نورزی هم ازاد او کابل ته ولېږدول شو.
اړوندې لیکنې :
- طالبانو په کابل کې د یو پخواني جنرال په ګډون درې کسان نیولي
- کابل ته د ازبکستان د صدراعظم سفر؛ طالب چارواکو سره يې بېلابېلو برخو کې هوکړې لاسليک کړي
- د ملګرو ملتونو د سرمنشي مرستیال افغانستان ته راځي
- طالبان: په تېرو دریو ورځو کې د سپین بولدک ۲۳۰ تنه هټېوال د کلدارو کارولو په تور بندیان شوي
- طالبانو په فاریاب کې د پخواني حکومت دوه پوځيان نیولي
- په بلخ کې د طالبانو د شکنجې په پاېله کې یو پخواني پوځي ساه ورکړې