د پاکستان بهرنیو چارو وزارت د هېواد په څو ولایتونو کې ځپوونکو سېلابونو ته په غبرګون کې ویلي چې په دې سخت وخت کې له افغانانو سره خپل پیوستون ښيي.
د پاکستان بهرنیو چارو وزارت شنبه د غويي پر ۲۲مه په اېکسپاڼه کې لیکلی: «د پاکستان حکومت او خلک د افغانستان په څو ولایتونو کې د سختو بارانونو او سېلابونو لامله د اوښتي ځاني زیانونو په اړه د زړه له کومې خواشیني دي.»
نوموړي وزارت لیکلي چې د دغې طبیعي پېښې ځپل شویو کورنیو، ټپيانو او زیانمنو ته «دعا» کوي.
د دې ترڅنګ د پاکستان د بهرنیو چارو وزیر اسحاق دار په اېکسپاڼه کې لیکلي چې دغې پېښې «غمجن» کړی دی.
وروستیو سېلابونو د هېواد په څو ولایتونو په ځانګړې ډول بغلان کې درانه ځاني او مالي زیانونه اړولي دي.
له دې وړاندې د خوړو نړیوال پروګرام ویلي و چې په بغلان کې وروستیو سېلابونو څه باندې ۳۰۰ کسان مړه کړي دي.
په بغلان کې ولسي سرچینې بیا وايي چې یوازې د دغه ولایت په دوو ولسوالیو کې د مړو شمېر ۲۵۰ تنو ته رسېدلی دی.
د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ له سېلاب ځپلو سره د بېړنیو مرستو غوښتنه کړې ده.
