په ننګرهار کې ځايي سرچینې وايي چې په دغه ولایت کې د تراویح لمانځه پرمهال دوو پلرونو د خپلو ماشومانو پرسر شخړه کړې چې له کبله یې یو کس ووژل شو.
دا پېښه جمعه شپه د وري پر ۳مه د ننګرهار سرخرود ولسوالۍ په «باولي» سیمه کې شوې ده.
د سرچینو په خبره، دا پېښه هغه مهال رامنځته شوه چې دوو ماشومانو د تراویح لمانځه پر مهال لفظي شخړه وکړه او روسته د دغو ماشومانو پلرونه چې عصمتالله او زرګل نومېده په خپل منځ کې نښتي دي.
د سرچینو د څرګندونو په حواله، د دې نښتې په پاېله کې زرګل چې د لوګر اصلي اوسېدونکی و، وژل شوی دی.
بلخوا، په ننګرهار کې د طالبانو امنیې قوماندانۍ ویاند عبدالبصیر زابلي هم پېښه تایید کړې او ویلي دي چې له پېښې روسته عصمتالله له سیمې تښتېدلی دی.
نوموړي ویلي چې د نیولو هڅې یې دوام لري.
د یادونې ده چې پرون د جلالاباد د اتمې امنیتي حوزې اړوند په سیمه کې یو سړي خپله مېرمن، زوی او اینګور د «روژه ماتي» پر مهال په ډزو وژلي دي.
