په غور کې سیمهییزې سرچینې وايي چې په دغه ولایت کې د طالبانو د یوې پوځي چورلکې د لوېدو پېښه کې لږترلږه یو کس ژوند بایللی او ۱۰ نور ټپیان شوي دي.
سرچینې ورځپاڼې ته منلې چې دا چورلکه چهارشنبه د غويي پر ۲۶مه د سهار شاوخوا ۲۰: ۱۰ بجې د غور مرکز فیروزکوه ښار اړوند د هریرود سیند په غاړه کې لوېدلې ده.
سرچينې د دې پېښې د ټپيانو روغتيايي حالت د اندېښنې وړ بللى دى.
تر اوسه د طالبانو د دغې پوځي چورلکې د غورځېدو لامل نه دی روښانه شوی.
طالبانو تر اوسه په دې هکله څه نه دي ویلي.
د تېر کال د غويي پر ۳۱مه هم د سمنګان ولایت خلم ولسوالۍ ته څېرمه د طالبانو یوه پوځي چورلکه غورځېدلې وه.
دا مهال طالبان د پخواني افغان حکومت له څو چورلکو ګټه پورته کوي.
ويل کېږي چې بهرنيو ځواکونو له هېواده د وتلو پرمهال د دغو چورلکو ځينې يې له منځه وړي؛ خو طالبان وايي چې یو شمېر پوځي چورلکې يې بیارغولې دي.
