پېژندل شوی افغان ډایرکټر عبدالرشید عظیمی ایران ته له کډوال کېدو وروسته، ګاریګرۍ ته مخه کړې ده.
په ټولنیزو رسینو کې ځينو سینمايي څېرو او فرهنګي فعالانو نن شنبه د سلواغې پر ۱۴مه داسې انځورونه خپاره کړي چې نوموړی په کومه ودانۍ کې پر سنګکارۍ بوخت ښيي.
ځينو سینمايي څېرو د دغه افغان ډایرکټر د انځورونو په خپرولو، د دې چارې لامل اقتصادي ستونزې یادې کړې دي.
له دې وړاندې هم دغه افغان ډایرکټر د اقتصادي ستونزو له کبله خپل سینمايي توکي لیلام کړي و.
تر اوسه عظیمي له ۳۲ ډېرو لنډو سینمايي فلمونو، مستندونو او د ټلویزیوني سریالانو ډایرکټري کړې او د «فیسبوک ډاټ کام»، «زرګري ژبه» او په هراتۍ لهجه د «کلک ششم» په نوم سریالونه یې نور هغه کارونه دي چې خلکو یې تود هرکلی کړی دی.
د «ګلچهرې» په نوم سینمايي فلم چې د یوې پیغلې نجلې کیسه لري د عظیمي له مشهورو هنري اثارو څخه ګڼل کېږي.
دا په داسې حال کې ده چې پر افغانستان د طالبانو له بیاواکمنېدو وروسته پر سینمايي چارو بندیزونه ډېر او ځيني هنرمندان د اقتصادي او امنیتي ستونزو له کبله هېواد پرېښودو اړ شول.
