په غور کې ځايي سرچینې وايي چې طالبانو د دغه ولایت درې اوسېدونکي د نایابه مرغانو د ښکار په تور نیولي دي.
سرچینو سهشنبه د سلواغې پر ۱۷مه رسنی ته منلې چې دا کسان د غور د ساغر ولسوالۍ اوسېدونکي و او تازه د نایابه مرغانو د ښکار په تور نیول شوي دي.
ورته مهال په غور کې ځايي طالب چارواکو هم ویلي چې دا کسان یې د «غرنیو ژویو او نایابه مرغانو» د ښکار کولو پر مهال نیولي دي.
دا کسان داسې مهال د ښکار په تور نیول شوي چې اوسمهال په فراه کې قطري شیخانو پورې اړوند د «الغرافه» په نوم کمپ فعال دی چې لسګونه ډوله نایابه مرغان او ښکار شوي ژوي پکې ساتل کېږي.
د ۱۴۰۱ کال په قوس میاشت کې د طالبانو د اطلاعاتو او کلتور وزارت له بهرنیو سیلانیانو سره د ۴۲ میلیونه امریکايي ډالرو په ارزښت هوکړهلیکونه لاسلیک کړل، څو په افغانستان کې د مرغانو د ښکار لپاره «قانوني» لار برابره شي.
په پخواني حکومت کې د مرغانو ښکار منع و؛ خو بیا هم په ځينو ولایتونو کې په ناقانونه توګه کېده.
