سیمهییزې سرچینې په تخار ولایت کې د طالبانو له خوا د تېر حکومت د کورنیو چارو وزارت د یو افسر د نیول کېدو خبر ورکوي.
سرچينې یکشنبه د غويي پر ۱۶مه ورځپاڼې ته وویل چې دا پخوانى سرتېرى او د هغه دوه ملګري چې ګلاب او زلمی نومېږي، د طالبانو له خوا څلور ورځې دمخه د تالقانو ښار کې په يوې پوسته کې د پلټنې پرمهال نیول شوي دي.
دا پخوانی سرتېری نصيراحمد نومېږي او شاوخوا يوه مياشت دمخه له ايرانه افغانستان ته شړل شوی او په خپل عادي ژوند بوخت و.
نصيراحمد د تخار ولايت مرکز تالقانو ښار د اهنګرانو کلي اوسېدونکی دی او په تېر حکومت کې د بنګي ولسوالۍ د امنيې قوماندانۍ د دلګي قومندان و.
طالبانو تر اوسه په دې هکله څه نه دي ویلي.
دا په داسې حال کې ده چې په افغانستان کې د ملګرو ملتونو مرستندویه پلاوي دفتر (یوناما) په دې وروستیو کې یو راپور خپور کړی او ویلي یې دي چې د طالبانو له خوا د عمومي بخښنې له اعلان سربېره د تېر حکومت د چارواکو او عسکرو خپلسري نیول، شکنجه، ناوړه چلند او د خلکو ناقانونه وژنې دوام لري.
اړوندې لیکنې :
- طالبانو په فاریاب کې د پخواني حکومت دوه پوځيان نیولي
- طالبانو په لغمان کې د تېر نظام دوه سرتیري نیولي
- طالبانو په غور کې درې کسان د نایابه مرغانو د ښکار په تور نیولي
- په سمنګان کې طالبانو اته کسان د حزبالتحریر د غړیتوب په تور نیولي
- طالبانو په کابل کې د یو پخواني جنرال په ګډون درې کسان نیولي
- طالبانو د هرات حوزوي روغتون څلور کارکوونکي نیولي دي