د بلوچستان پخواني ایالتي وزیر او د بلوڅ ملتپاله غورځنګ ملاتړي، تارا چند، له ولسمشر ډونالډ ټرمپ څخه غوښتي چې د بلوچستان د خپلواکۍ ملاتړ وکړي او دا سیمه له پاکستانه بېله کړي.
نوموړي په خواله رسنۍ ایکس لیکلي چې که ټرمپ رښتیا د سولې نوبل جایزه غواړي، نو باید د بلوچستان د ازادۍ لپاره عملي ګامونه واخلي.
تارا چند تور لګولی چې پاکستاني پوځ له اویا کلونو راهیسې بلوچستان تر اشغال لاندې ساتلی او د بلوڅ ولس پر وړاندې د نسلوژنې لړۍ روانه ده.
هغه ویلي چې پوځ د سیمې طبیعي زېرمو لوټ ته دوام ورکوي، خو خلک یې لا هم له بنسټیزو خدمتونو لکه اوبو، برېښنا او ښوونې بېبرخې دي.
