د افغانستان د ملي امنیت ریاست پخواني مرستیال اجمل عبید عابدي ویلي، طالبان یوازې د یوې کورنۍ ډلې په توګه نه شي تعریف کېدای، بلکې د القاعده تر مستقیمې اغېزې لاندې فعالیت کوي.
نوموړي ټینګار وکړ چې د طالبانو ټولې ستراتیژۍ او پرېکړې د القاعده له خوا تنظیمېږي او دا وضعیت د سیمې او نړۍ لپاره د جدي اندېښنې وړ دی.
عابدي زیاته کړه، طالبان هڅه کوي نړۍ ته داسې انځور وړاندې کړي چې ګواکې القاعده نور د لوېدیځ پر وړاندې ګواښ نه دی، خو په حقیقت کې القاعده د طالبانو د کړنو تر شا اصلي رهبره ده.
د هغه په وینا، د دواړو ډلو ګډ فعالیتونه د سیمې د ثبات او نړیوال امنیت لپاره اوږدمهاله ګواښونه زېږوي او نړۍواله ټولنه باید پر وخت جدي اقدام وکړي.
