د بشري حقونو څار سازمان درې مخکښو څېړونکو ویلي، چې د طالبانو لهخوا پر افغان مېرمنو لګول شوي سیستماتیک محدودیتونه باید د جنسیتي توپیر او د بشریت ضد جنایت په توګه وپېژندل شي.
دغه څېړونکي، هېدر بار، ماکارنا سایس، او استیسي لي مانوېل، ویلي چې نړیوال غبرګون د افغانستانی ښځو د حقونو د دفاع لپاره کافي نهدی.
دوی ټینګار کړی چې د طالبانو لهخوا د ښځو دوامداره ځپل او د بشري حقونو فعالانو هڅې، د نړیوالو ملاتړ جدي خلا ښکاره کړې ده.
دا څرګندونې په داسې حال کې کېږي، چې طالبان ادعا کوي د ښځو حقونه د اسلامي شریعت په چوکاټ کې تضمین دي، خو عملي اقدامات یې پراخ محدودیتونه پر ښځو وضع کړي چې دننه او بهر پرې نیوکې روانې دي.
