د ارغواني شنبو غورځنګ د طالبانو لهخوا د ښځو لپاره د طبي انستیتونو د تړلو په غبرګون کې وایي، چې په افغانستان کې د ښځو په وړاندې د طالبانو لهخوا د طبي مرکزونو تړنه د افغان نجونو د هیلو وروستی روښنایي هم تته کړه.
دغه غورځنګ د یوې خبرپاڼې په خپرولو سره ویلي، چې پر طبي زدهکړو بندیز د هېواد روغتیایي سیستم ګډوډ کړی دی.
خبرپاڼه زیاتوي، ښځینه طبي متخصصینې د ښځو او ماشومانو د پاملرنې په برخه کې اړینې دي، په ځانګړې توګه په داسې ټولنه کې چې واکمن دودونه تر ډېره نارینه ډاکټرانو ته د ښځو د ورتګ مخه نیسي.
دغه غورځنګ د اندېښنې په څرګندولو سره لیکلي، چې دغه فرمان د مېندو او ماشومانو روغتیایي حالت ته چې وار د مخه په کړکېچن حالت کې دی، نور زیان هم اړوي چې ورسره د بې شمېره مړینو لامل هم کېدای شي.
د خبرپاڼې له مخې، دغه فرمان پر افغان ښځو د طالبانو لهخوا د محدودیتونو هغه لړۍ تعقیبوي، چې په دې کې د ثانوي او لوړو زدهکړو او د ښځینهو په کار کولو د بندیز ترڅنګ ځیني نور بندیزونه هم شامل دي.
خبرپاڼه وړاندې کاږي، چې د طبي مرکزونو تړل د عامه ژوند له هر اړخه د ښځو د حذفولو لپاره د طالبانو د هوډ ښکارندویي کوي.
خبرپاڼه کې راغلي، طالبان د افغانستان د ښځو د ارمانونو په له منځه وړلو سره د هغوی له بنسټیزو حقونو څخه هم سرغړونه کوي.
د دغې خبرپاڼې په وروستۍ برخه کې راغلي، چې نړۍواله ټولنه باید په بېړنۍ توګه د افغان ښځو د ملاتړ لپاره اقدام وکړي، د هغوی غږ دې پورته کړي او طالبان دې د بشري ضد کړنو لپاره حساب کتاب او ځواب ویلو ته راکاږي.
