د روغتيايي انسټیټوټونو او ښځینه زده کوونکو له منځه سرچینې تاييدوي چې د طالبانو د عامې روغتیا وزارت په دې انسټیټوټونو کې د نجونو پر زده کړو د بندیز امر ورکړی دی.
د سرچینو په وینا، د طالبانو عامې روغتیا وزارت دا امر د روغتيايي انسټیټوټونو له مسوولینو سره په غونډه کې په شفايي توګه اعلان کړی دی.
د یوه روغتيايي انسټیټوټ مسوول ويلي چې له دوی غوښتل شوي چې تر «بیا خبرتیا» پورې دې ښځینه زده کوونکې رخصت کړي.
په کابل کې د روغتیايي انسټیټونو یوه بل مسوول هم په یوه غږیز پیغام کې له ښځینه زده کوونکو غوښتي چې سبا دې انسټیټوټونو ته نه ورځي.
د طالبانو عامې روغتیا وزارت تر اوسه په دې اړه په رسمي توګه څه نه دي ويلي.
د انسټیټوټونو د ځنډېدو خبر له نن مازیګر څخه لاس پر لاس کېږي. د طالبانو ویاندویانو هم تر اوسه په دې اړه څه نه دي ويلي.
که څه هم په پوهنتونو کې د نجونو پر زده کړو بندیز لګول شوی و، خو روغتيايي انسټیټوټونه پرانیستي وو.
په دې انسټیټوټونو کې نجونو ته د قابلګۍ او نرسنګ زده کړې ورکول کېدې.
