په پکتیکا کې ځايي سرچینې وايي چې طالبانو یو پخوانی ځايي قوماندان له مقاومت جبهې سره د همکارۍ په تور نیولی دی.
سرچینو دوشنبه د لړم پر ۲۸مه ویلي چې دا قوماندان «کشمیر» نومېږي او د پکتیکا شرنې ولسوالۍ له محمدخېلو کلي نیول شوی دی.
د سرچینو په وینا، طالبانو نوموړی یوه میاشت مخکې له ثبوت پرته نیولی دی.
سرچینو زیاته کړې چې «کشمیر» له مقاومت جبهې سره هېڅ ډول اړیکه نه لرله او یوازې د سیمې خلکو د ستونزو په حل او فصل بوخت و.
دا په داسې حال کې ده چې طالبانو اته میاشتې وړاندې په پروان کې یو ډاکتر د «مقاومت جبهې یو غړي د درملنې په تور» په بګرام زندان کې بندي کړی دی.
