په ننګرهار او هرات کې ځایي سرچینې وايي، چې په دغو ولایتونو کې دوه ځوان هلکان د ناپېژاندو کسانو له لوري وژل شوي دي.
سرچینېو پنجشنبه د لړم پر ۳مه، ۸صبح ورځپاڼې ته وویل چې یو ځوان پرون په ګوشتې ولسوالۍ د «تبر» په مټ وژل شوی دی.
د سرچینو په وینا، دغه ځوان د قرآن حافظ و او له جوماته کورته د ستنېدو پرمهال د ناپېژندو کسانو له خوا وژل شوی دی.
په همدې حال کې، سرچینو په هرات کې هم د یوه ۲۷ کلن ځوان د وژل کېدو خبر ورکړی دی.
د سرچینو د معلوماتو له مخې، دغه ځوان چې د یوې مخابراتي شبکې د انتن ساتنه کوله، د لړم په لومړۍ نېټه، د سې شنبې پر شپه د کرخ ولسوالۍ د «ریزک» په کلي کې د خپل کار په ځاى کې د چړې په ګوزارونو وژل شوى دى.
تر اوسه د دغو دوو پېښو انګېزه نه ده څرګنده شوې.
په ننګرهار او هرات ولایتونو کې د طالبانو ځايي چارواکو تر اوسه د دغو پېښو په اړه څه نه دي ويلي.
د يادونې ده، چې په دې وروستيو کې د هېواد په بېلابېلو سيمو کې جنايي پېښې په بې ساري ډول زياتې شوې دي.
