د نيمروز سيمهييزې سرچينې وايي چې طالبانو د دغه ولايت د یو اوسېدونکي کور ته د دغې ډلې د درېيو جنګياليو د ننوتلو په هکله د خلکو د خبرولو په تور لږ تر لږه ۴۰ کسان نيولي او بنديان کړي دي.
سرچینو چهارشنبه د لړم پر ۲مه، ويلي، دوه شپې مخکې د کنګ ولسوالۍ اړوند په «حاجي عزیز ماککي» کلي کې درې طالب جنګیالي په داسې حال کې چې هېڅ نارینه په کور کې حضور نه درلود، د دغه کلي د یو اوسېدونکي کور ته ننوتلي وو.
د سرچینو په وینا، طالب جنګیالیو د ننوتلو پرمهال د دې کورنۍ غړي چې ټول ښځې او ماشومان وو، له کوره د ایستلو په موخه ځورولي دي.
د سرچینو د معلوماتو پر بنسټ، وروسته له دې چې طالب جنګیالي د سیمې خلکو په مرسته را وویستل شول، د دغې ډلې نورو ګڼ شمېر جنګیالیو پر دغه کلي چاپه وهلې او لږ تر لږه ۴۰ کسان یې له ځان سره بیولي دي.
که څه هم دغه کور ته د طالبانو د ننوتلو لامل نه دی څرګند شوی، خو د دغې ډلې له منځه سرچینو ویلي چې د جنګیالیو موخه یې د د نشهيي توکو پلټنه وه.
په نیمروز کې طالب سیمهییزو مسوولانو تر اوسه په دې تړاو څه نه دي ویلي.
د يادونې ده چې طالبان له تېرو درېيو کلونو راهيسې په دوامداره توګه د بېلابېلو پلمو له وجې د خلکو کورونو ته ننوتلي دي.
