سرچینې وايي چې د خیبرپښتونخوا په سوېلي وزیرستان کې د پاکستاني طالبانو ترمنځ د خپلمنځي نښتې په ترڅ کې د دغې ډلې د یوه قوماندان په ګډون څلور کسان وژل شوي دي.
ډان یکشنبه د اکټوبر پر ۲۰مه راپور ورکړی چې دا نښته تېره ورځ د قوماندان نیاز وزیر او قوماندان منهاج بټ د جنګیالیو ترمنځ شوې ده.
د راپور پر بنسټ، په دې نښته کې نياز وزير او د هغه درې ساتونکي وژل شوي دي.
د معلوماتو له مخې، دا نښته د منهاج بټ له خوا د نیاز وزیر د وژل کېدو له امر وروسته چې تازه له افغانستانه پاکستان ته دننه شوی و، پېل شوې ده.
وزیر په سوېلي وزیرستان کې د ټيټيپي د عملیاتو مسوول و.
دا نښته د بیرمل ولسوالۍ په «نندرون او نارګاسا» غرنيو سيمو کې شوې ده.
وروستي کلونه په يادو سیمو کې د وسلهوالو فعالیتونه ډېر شوي دي.
همداراز تېره ورځ په یوې بلې پېښه کې د لکيمروت ولسوالۍ په تختيخېلو سیمه کې د پاکستان د ترهګرۍ ضد پولیسو سره د نښتې پرمهال یو وسلهوال وژل شوی دی.
په دې نښته کې یو ملکي وګړی هم وژل شوی دی.
په يوې بلې پېښه کې د خيبرپښتونخوا په خان ولسوالۍ کې د سړک غاړې ماين چاودنې له کبله دوه پاکستاني پوځیان ټپيان شوي دي.
پاکستاني طالبانو تر اوسه په دې تړاو څه نه دي ویلي.
له دې مخکې هم د ټيټيپي وسلهوالو ترمنځ د خپلمنځي نښتو راپورونه ورکړل شوي وو.
