د پاکستان لومړي وزیر شهباز شریف یو ځل بیا د طالبانو تر واک لاندې افغانستان کې د ټولګډوني حکومت د جوړېدو غوښتنه کړې ده.
شريف دغه څرګندونې چهارشنبه د تلې پر٢٥مه، د پاکستان په پلازمېنه اسلام اباد کې د شانګهای سازمان په غونډه کې کړې دي.
هغه یو ځل بیا ټینګار کړی دی چې طالبان باید له افغانستانه د نورو هېوادونو پر وړاندې د «ترهګریزو ډلو» د استفادې مخه ونیسي.
د اېکسپرېس ټریبیون د راپور له مخې دغه لوړپوړي پاکستاني چارواکي له نړیوالې ټولنې هم غوښتي دي چې د افغانستان د خلکو ملاتړ وکړي.
د پاکستان د لومړي وزیر په وینا، یو باثباته افغانستان د سیمه ییزو اقتصادي پروژو له پلي کېدو سره مرسته کولای شي.
په دې غونډه کې د شانګهای سازمان د غړو هېوادونو مشرانو د چین د « یو کمربند او ېوې لارې» طرحې د پراختیا غوښتنه کړې ده.
د یادونې وړ دهو چې اسلام اباد پرون د شانګهای د غونډې شاهد و.
په دې غونډه کې د چين لومړي وزیر لي کيانګ؛ د روسیې لومړی وزیر میخایل میشوستین،؛ د هند د بهرنیو چارو وزیر سوبرامانیم جیشنکر؛ د ایران د ولسمشر لومړی مرستیال محمد رضا عارف او د قرغزستان، بیلاروس، قزاقستان، تاجکستان او منګولیا لومړي وزیرانو ګډون کړی و.
دا په داسې حال کې ده چې تر دې وړاندې هم د یو شمېر هېوادونو مشرانو له طالبانو د ټولګډوني حکومت د جوړېدو غوښتنه کړې وه.
