د بدخشان سیمهییزې سرچینې وايي، یو طالب جنګيالي د خپل ورور پخوانۍ مېرمن له دې کبله وژلې چې د واده وړانديز يې نه دی منلی.
سرچینو سهشنبه د تلې پر ۱۷مه، منلې دا ښځه شاوخوا دوه اوونۍ مخکې تښتول شوې وه او مړی یې تېره ورځ په جرم ولسوالۍ کې د خپل کور مخې ته موندل شوی دی.
د سرچینو په وینا، دې ۳۷ کلنې ښځې نه غوښتل چې د خپل پخواني خاوند له ورور سره واده وکړي.
دې ښځې شاوخوا درې کاله مخکې خپل پخوانی خاوند له لاسه ورکړی و.
د سرچينو د معلوماتو پر بنسټ، دې ښځې د جرم ولسوالۍ په کلينيک کې د خدمه کارکوونکې په توګه کار کاوه.
په بدخشان کې طالب سيمهیيزو مسوولينو هم د دې ښځې وژنه منلې او ویلي یې دي چې د پېښې په تړاو يې يو کس نيولى دى.
له دې مخکې هم طالب جنګیالیو نجونې او ښځې د واده غوښتنې د نهمنلو له کبله وژلې وې.
څو میاشتې مخکې طالبانو د فاریاب په المار ولسوالۍ کې یوه ځوانه نجلۍ له دې کبله په ډزو وژلې وه چې د واده وړاندیز نه و منلی.
