د امریکا ولسمشر جو بایدن د اسراییلو له لومړي وزیر بنیامین نتنیاهو غوښتي چې د غزې د اوربند هوکړه لیک وروستۍ کړي.
بایډن چهارشنبه د اګسټ پر ۲۱مه، پر اېکس ټولنیزه پاڼه لیکلي چې دا خبره یې له نتنیاهو سره په ټیلیفوني اړیکه کې کړې ده.
هغه زیاته کړې: «ما یو ځل بیا څرګنده کړه چې موږ باید د اوربند او د برمته نیول شویو کسانو د خوشي کولو هوکړه وروستۍ کړو.»
د امریکا ولسمشر دغه راز ویلي چې د قاهرې په مذاکراتو کې د پاتې خنډونو د لېرې کولو په اړه یې د اسراییلو له لومړي وزیر سره خبرې کړې دي.
بایډن یو ځل بیا پر اسراییلو د ایران او د هغه د نیابتي ډلو د احتمالي برید پر وړاندې له تل ابیبه د واشنګټن پر ملاتړ ټینګار کړی دی.
په غزه کې د اوربند هوکړې ته د رسېدو له هڅو سره سره، په دې سیمه کې ترینګلتیا زیاته شوې ده.
د امریکا د بهرنیو چارو وزیر انټوني بلینکن هم دوه ورځې وړاندې له ښکېلو خواوو غوښتي چې د اوربند د هوکړې لپاره له وروستي فرصته ګټه واخلي.
بلینکن اسراییلو ته له سفر او د هغوی له چارواکو سره له کتنې وروسته ویلي چې تل ابیب د غزې د اوربند هغه وړاندیز منلی دی چې واشنګټن یې ملاتړ کوي.
د حماس غورځنګ او نورو فلسطیني ډلو هم د غزې د اوربند د هوکړې د پلي کولو لپاره د بایډن وړاندیز د عملي کېدو غوښتنه کړې ده.
