د پاکستان د بهرنیو چارو وزارت وايي چې د کډوالو په چارو کې د ملګرو ملتونو عالي کمېشنر فیلپو ګرانډي د دغه هېواد د لومړيوزیر له مرستیال او بهرنیو چارو وزیر، اسحاق دار سره د افغان کډوالو د ستونزو په هکله خبرېاترې کړې دي.
د پاکستان د بهرنیو چارو وزارت دوشنبه د چنګاښ پر ۱۸مه په خپله اېکسپاڼه کې د یو پوسټ په خپرېدو سره د دې لیدنې خبر ورکړی دی.
دغه وزارت زیاتوي چې ګرانډي د افغان کډوالو د وضعیت په هکله خپلې اندېښنې مطرح کړې دي.
د خبرپاڼې پر بنسټ، نوموړي په پاکستان کې افغان کډوالو ته د اسانتیاوو د برابرېدو غوښتنه کړې ده.
دا په داسې حال کې ده چې پاکستان سږکال د هغو پناهغوښتونکو د ایستلو دویم پړاو چې ډېری یې افغانان دي، پېل کړی دی.
له پاکستانه هره ورځ زیات شمېر افغان کډوال هېواد ته دننه کېږي.
د نړیوالو سازمانونو د خپاره شویو معلوماتو له مخې، په پاکستان کې شاوخوا ۲.۱۸ میلیونه اسنادلرونکي کډوال، ۱.۳ میلیونه د ثبت کارټلرونکي او شاوخوا ۸۸۰ زره د لنډمهالې استوګنې کارټلرونکي، ژوند کوي.
