د سمنګان ولایت په ځینو سیمو کې له وروستیو سېلابونو وروسته سیمهییزې سرچینې وايي چې د خرم سارباغ او روی دواب ولسوالیو ولسوالان، د استخباراتو رئیس او امنیه قوماندان له خپلو دفترونو تښتېدلي دي.
سرچینو شنبه د غبرګولي پر ۸مه ورځپاڼې ته ویلي چې په دې دوو ولسوالیو کې د طالبانو سیمهییز مسوولان له څو ورځو راهیسې خپلو دندو ته نه دي حاضر شوي.
د سرچينو په خبره، د وروستيو سېلابونو له کبله د خرم سارباغ او روى دواب ولسواليو لارې ويجاړې شوي؛ خو د طالبانو سيمهييز مسوولان له دې ولسوالیو څخه د بغلان او بامیان له لارې تښتېدلي دي.
په دې ولسواليو کې د طالبانو سیمهییز مسوولانو د سیمې خلکو ته د لارو د پرانېستلو امر کړی دی.
بل خوا سیمهییزې سرچينې وايي چې د لارو د بندېدو له کبله په يادو ولسواليو کې د خامو توکو بيې تر پخوا «څلور برابره» لوړې شوې دي.
له خرم، سارباغ او روی دواب ولسوالیو څخه د طالبانو د سیمهییزو مسوولانو تېښته د سیمې د نورو طالبانو له سخت غبرګون سره مخ شوې ده.
د طالبانو اړوند د ټولنیزو رسنیو یو شمېر کاروونکي خپل سیمهییز مسوولان په بې غورۍ تورنوي.
د يادونې ده چې په دې وروستيو اوونيو کې بارانونو او سېلابونو هېوادوالو ته ځاني او مالي زيانونه اړولي دي.
طالبانو په دې وروستیو کې ویلي چې د روان کال د غبرګولي له څلورمې تر شپږمې نېټې پورې په هېواد کې سېلابونو ۲۱ تنه مړه کړي دي.
