په افغانستان کې د ملګرو ملتونو مرستندویه بنسټ (یوناما) ویلي چې په بغلان کې سېلابونو ۶۰ زره کسان اغېزمن کړي.
یوناما دوشنبه د غويي پر ۳۱مه په اېکسپاڼه کې لیکلي چې په دغو سېلابونو کې ۱۸۲ کسان مړه شوي.
د یوناما بشري چارو مرستیال اندریکا راټوات بغلان څخه د لیدنې پرمهال ویلي چې په مړو شویو کې ډېری یې ښځې او ماشومان دي.
یوناما زیاته کړې چې د ملګرو ملتونو مرستندویه ډلې بدخشان، بغلان او تخار کې سېلاب ځپلو ته د لومړنیو مرستو وړاندې کولو لپاره استول شوې دي.
اندریکا راټوات ټينګار کړی چې نړیواله ټولنه دې په افغانستان کې د سېلاب ځپلو خلکو اړتیاوو پوره کولو کې همکاري او ملاتړ وکړي.
نوموړي زیاته کړې چې ملګرو ملتونو او شریکانو یې تراوسه د ۱۵ زرو سېلاب ځپلو لاسنیوی کړی دی.
له دې وړاندې د ملګرو ملتونو د ښځو څانګې ویلي چې په افغانستان کې د وروستیو سېلابونو له کبله ښځې او ماشومان په نامتناسب ډول اغېزمن شوي.
دغه بنسټ د افغانستان په ځينو شمالختیځو ولایتونو کې د راوتلو سېلابونو په تړاو یو راپور کې لیکلي چې په دې سېلابونو کې نارینهوو په عمومي ودانیو لکه جوماتونو کې پناه اخیستې وه.
د دغه راپور پر بنسټ، دمګړۍ د سېلاب ځپلو بېړنۍ اړتیاوې سرپناه، مالي او نغدي مرستې، خوراکي او ناخوارکي توکي او روغتیايي چوپړونه دي.
د یادونې ده چې د هېواد په ځينو برخو په ځانګړې توګه بغلان کې د وروستیو خونړیو سېلابونو په پاېله کې څه باندې ۳۱۰ کسان مړه شوي.
