په افغانستان کې د ملګرو ملتونو له ماشومانو د ملاتړ صندوق (یونیسف) ویلي چې افغان ماشومان ګڼ کړاوونه زغمي.
یونیسف شنبه د غويي پر ۲۹مه په اېکسپاڼه کې لیکلي چې سېلابونه د ماشومانو په ګډون خلکو ته د سر زیان ترڅنګ درانه زیانونه اړوي.
دغه بنسټ زیاته کړې: «موږ له ټولو زیانمنو سره خواخوږي ښېیو.»
یونیسف یادونه کړې چې له ټولنو د ملاتړ لپاره د مرستو په اوډون بوخت دی.
له دې وړاندې یونیسف ویلي و چې په بغلان کې وروستیو سېلابونو ۵۱ ماشومان مړه کړي.
اخوا په غور کې طالب چارواکي وايي چې په دغه ولایت کې وروستیو سېلابونو د ښځو او ماشومانو په ګډون شاوخوا ۵۰ کسان مړه کړي او ځینې لادرکه دي.
څرګنده نه ده چې په غور کې د پرونیو سېلابونو له کبله څو ماشومان مړه شوي.
د یادونې ده چې په افغانستان کې د هوا پېژندنې ادارې اټکل کړی چې سبا (یکشنبه) ښایي د هېواد په شپاړسو ولایتونو کې نور بارانونه هم وشي.
