افغان سوداګر میرویس عزیزي ویلي چې په هېواد کې یې له سېلاب ځپلو سره ۵۰ میلیونه افغانۍ مرسته کړې ده.
عزیزي شنبه د غويي پر ۲۲مه په اېکسپاڼه کې لیکلي چې ورور ته یې دنده ورکړې څو په بېړه بغلان ته مرستندویه ډله واستوي.
نوموړي لیکلي: «زه د دغې طبیعي پېښې زیانمنو کورنیو ته د خواخوږۍ او ډاډګيرنې مراتب وړاندې کوم، په پېښه کې اوښتو زیانونو ته په کتو مې پرېکړه وکړه چې له ټپيانو او زیانمنو شویو کورنیو سره د عزیزي بنسټ له خوا د ۵۰ میلیونه افغانیو په ارزښت بېړنۍ مرستې وکړم.»
له دې وړاندې د خوړو نړیوال پروګرام ویلي و چې په بغلان کې وروستیو سېلابونو څه باندې ۳۰۰ کسان مړه کړي دي.
نوموړي بنسټ زیاته کړې چې سېلابونو څه باندې زر کورونه هم نړولي دي.
اخوا، د طالبانو تر کنټرول لاندې طبیعي پېښو ته د رسېدو په چارو کې د دولت وزارت ویلي چې ځينو ولایتونو کې وروستیو سېلابونو ۸۵ کسان مړه کړي دي.
د نوموړي وزارت په خبره، دغو سېلابونو په بغلان، تخار، بدخشان، سمنګان، فاریاب، هرات او غور کې څه باندې ۱۰۰ کسان ټپيان کړي هم دي.
نن د طالبانو د ترانسپورت او هوايي چلند وزارت د هوا پېژندنې ادارې د هېواد په اتو ولایتونو کې د شدیدو ورښتونو، تالندې برېښنا او سېلابونو پېښېدو اټکل کړی دی.
