په تخار کې سیمهییزې سرچینې وايي چې د طالبانو پوهنې وزارت په تالقان ښار کې د نجونو د دوو لېسو ودانۍ پر دارالعلوم بدلې کړې دي.
سیمهییزو سرچینو سهشنبه د وري پر ۲۸مه ورځپاڼې ته منلې چې په تخار کې د طالبانو پوهنې ریاست له پوهنې وزارت سره په همغږۍ د بيبي مریم او نمبر اول لېسو ودانۍ دارالعلوم ته ځانګړې کړې دي.
د سرچینو په خبره، دا دوه لېسې په تالقان ښار کې د نجونو له پخوانیو لېسو څخه شمېرل کېږي چې د پخواني حکومت پرمهال پکې له نهمه تر ۱۲ ټولګي شاوخوا اووه زره نجونو زدهکړې کولې.
سرچینې ادعا کوي چې د نوي تعلیمي کال له پېل سره د دولتي ښوونځيو د اووم، اتم، نهم، لسم، یوولسم او له دولسمو ټولګیو فارغې شاوخوا ۷۶۰ نجونې جذب شوې دي او اوس د قرانکریم په حفظ، عقاید او نورو اسلامي کتابونو په زدهکړو بوختې دي.
په تخار کې د پوهنې ریاست طالب چارواکو په دې اړه له خبرو اترو ډډه کړې ده.
واک ته د طالبانو له رسېدو وروسته، په تخار کې د تخنیکي او مسلکي لېسې په ګډون د یو شمېر ښوونیزو او زدهکړییزو بنسټونو ودانۍ په جهادي مدرسو بدلې شوې دي.
نږدې درې کاله کېږي چې له شپږم ټولګي پورته نجونې ښوونځيو ته له تګه محرومې دي.
