په بدخشان کې د طالبانو امنیې قوماندانۍ په دغه ولایت کې د یوې پېغلې د ځانوژنې خبر ورکړی دی.
په بدخشان کې د طالبانو امنیې قوماندانۍ ویاند احسانالله کامګار ویلي چې دا نجلۍ د فیضاباد ښار اړوند د «خرقه مبارک» سیمې اوسېدونکې وه او جمعه د وري پر ۱۷مه شپه مهال یې «د موږک د وژلو درمل» خوړلي دي.
د نوموړي په خبره، نجلۍ ولایتي روغتون ته له رسېدو وړاندې ساه ورکړې ده.
تر اوسه د دغې ځانوژنې انګېزه څرګنده نه ده؛ خو کامګار ویلي چې په دې تړاو یې څېړنې پېل کړې دي.
پر افغانستان د طالبانو له بیاواکمنېدو او د بېوزلۍ او بېکارۍ له زیاتېدو وروسته په خلکو په ځانګړې ډول په ځوانانو کې د ځانوژنې پېښې ډېرې شوې دي.
دا په داسې حال کې ده چې تېره اوونۍ په ننګرهار کې یو ځوان د اقتصادي ستونزو له کبله ځان ۹۰ متره ژورې څاه ته غورځولی او ځانوژنه یې کړې وه.
