په کابل کې د ایران پخواني سفیر محمدرضا بهرامي ویلي چې په افغانستان، پاکستان او منځنۍ اسیا کې افراطي ډلو ترمنځ تعامل د ژبنیو، توکمیزو پیوندونو او نورو مناسباتو له کبله پېچلې بڼه خپله کړې ده.
بهرامي شنبه د وري پر ۱۱مه په خپله اېکسپاڼه کې لیکلي چې د قدرتونو په سیالۍ کې د دغو افراطي ډلو د کارولو امکان د افراط پدېدې له دوام سره مرسته کوي.
نوموړي زیاته کړې: «د سیالۍ په دې ډګر کې دا ډلې د قدرت له مخې تعریف کېږي نه د ایډیالوژۍ پر بنسټ.»
نوموړي د کومو ځانګړو ډلو نوم نه دی یاد کړی.
د یادونې ده چې بهرامي له دې وړاندې د طالبانو پر پالیسیو نیوکه کړې ده.
نوموړي څو ورځې وړاندې ویلي و چې طالبانو په روسیه کې د کنسرټ پر سالون شوی برید «ترهګریز» بللی؛ خو په خبره یې، پروسږکال یې د ایران په کرمان کې شویو چاودنو ته د دې ټکي له کارولو ډډه کړې وه.
