پر افغان خاوره د پاکستان له هوايي بریدونو او په درېیو ولایتونو کې د طالبانو او پاکستاني پوځیانو ترمنځ د نښتو له رامنځته کېدو وروسته، واشنګټن له دواړو خواوو غوښتي څو له زغمه کار واخلي.
سپینې ماڼۍ او د امریکا د بهرنیو چارو وزارت دوشنبه ناوخته د کب پر ۲۸مه په یوې خبري ناستې کې ویلي چې دواړه خواوې باید خپل اختلافات د خبرو له لارې حل کړي.
د سپینې ماڼۍ ویاند کېرن ژان پیر ویلي چې دواړه خواوې باید خپل اختلافات د خبرو له لارې حل او د ملکیانو خوندیتوب ډاډمن کړي.
ورته مهال، د امریکا د بهرنیو چارو وزارت د ویاند مرستیال ویدانت پټېل هم ویلي چې دواړه خواوې باید حداقل د تلفاتو د پای ته رسېدو لپاره اقدامات ترسره کړي.
پټېل پاکستان یو اړین او کلیدي شریک بللی او ویلي یې دي، کله چې له تروریزم سره د مبارزې او نورو ګډو امنیتي لومړیتوبونو په هکله خبرې کېږي، واشنګټن له اسلامآباد سره په منظمه توګه په اړیکه کې دی.
ده د مرګژوبلې د راپورونو په تړاو ويلي چې په شمالي وزيرستان کې د پاکستاني پوځ پر پوستې د ځانمرګي بريد او له هغې وروسته په افغانستان کې د نښتو په ترڅ کې د ملکيانو پر وژلو خواشينی شوی دی.
دوشنبه سهار د کب پر ۲۸مه، پاکستان د پکتیکا او خوست پر سیمو هوايي بریدونه وکړل او ادعا یې کوله چې د عبداللهشاه په نوم د ټيټيپي د یوه قومندان پر مرکز یې برید کړی، هغه پېښه چې څو ساعته وروسته په یو ویډیویي کلېپ کې د دغې ډلې قومندان رد کړه.
په دغو بريدونو کې د ښځو او ماشومانو په ګډون اته ملکيان ووژل شول او په غبرګون کې یې د پکتيا په انګور اډه، ډنډپټان او د خوست په تنګي ولسوالۍ کې د طالبانو او پاکستاني پوځیانو ترمنځ سرحدي نښتې پيل شوې.
دا مهال، که څه هم له پرونه راهیسې په دغو سیمو کې نښتې درېدلې؛ خو سرچینې وايي چې دواړه خواوې د تیارسۍ په حال کې دي.
اړوندې لیکنې :
- په هېواد کې وروستیو سېلابونو ته د پاکستان غبرګون: په دې سخت وخت کې له افغانانو سره ولاړ یو
- په نوي ډیلي کې د ۲+۲ غونډه؛ امریکا او هند له طالبانو غوښتي چې پر خپلو ژمنو عمل وکړي
- په امریکا او اروپا کې د منظور پښتین د بندي کېدو په غبرګون کې لاریونونه وشول
- د امریکا استازي او د قطر د بهرنیو چارو وزیر د افغانستان په هکله خبرېاترې وکړې
- په پاکستان کې وروستیو ورښتونو او سېلابونو ۱۵۶ کسان مړه کړي
- د امریکا د بهرنیو چارو وزارت: واشنګټن د خپلو ملي ګټو د خوندیتوب لپاره له طالبانو سره تعامل کوي